الحمد لله والشكر نبتدي به .. فالظاهر وباطن وباوّل وتالي

على النِّعمْ وقلوبنا له مُنيبه.. يا كثر ما انْعَم به عظيم الجلالي

ومن نعمة الله مملكتنا الحبيبه .. اطهر وطن من دون شك وجدالي

وِحْدَه وتوحيد وأمن نِكْتسي به .. من بعد م اسَّسْها عظيم الفعالي

عبدالعزيز الباني الله يثيبه .. موحِّد الدولهْ بطيب الخصالي

على هُدى شرْعٍ (ن) لنا نِهْتدي به .. على كتاب الله بشتى المجالي

وسُنَّة نبيٍّ مصطفى نقتدي به .. ومنْهج سلفنا بالوسط واعتدالي

بعد التَّشتت والظروف العصيبه .. وظلام جهْل ونَهْب والاقتتالي

العلم شاع وامننا نِهتني به .. فالغرب والشرق وجنوب وشمالي

لَمَّ الشّمل بعد السنين التِّعيبه .. وتاريخنا سطَّر لِه أروع مثالي

الصف واحد والرخا نِرتوي به .. كيان مترابط ما فيه اختلالي

والشعب مِتْلاحم ولا هي غريبه .. مع قادِتِه حتى رِقى للمعالي

وعلى النَّهَجْ سار الملوك اللِّبيبه .. من بعده بجهْد وبذل وبكمالي

أبنائه اللي فعلهم ينحكي به .. هُمْ للوطن والشعب فخر وظِلالي

آل السعود ملوك قوَّه وهيبه .. عِزَّ الوطن والشعب والراس عالي

حتى وصلنا عهد من نعتزي به .. ابو فهد سلمان زبْن الثقالي

تفخر به البيتين مكه وطيبه .. خيره با مر ربي علينا متوالي

كُلَّ الدول فا للازمه تِنْتِخي به .. عَوْن وذرى للاجنبي والمُوالي

وولي عهده طَوَّع الْنا الصَّعيبه .. بجهود جباره وقوِّ احتمالي

محمد اللي له مواقف رهيبه .. طوّر ويِرْخِص للوطن كل غالي

كاد العِدا واهل الوجيه الغضيبه .. واهل الفتن والزيغ واهل الضلالي

المجد دار المملكة تعتلي به .. وهْيَا لنا دارٍ (ن) وبدر (ن) يلالي

واليوم حِنَّا ذا الوطن نحتفي به .. أفداه بعيوني وروحي ومالي

يا الله يا مَنْ كُلَّنا نلتجي به .. تحفظ وطنا يا عظيم امتعالي

وتجعل جميع أيامنا مُسْتطيبه .. في ظِلّْ قادتنا كِرام السبالي

وتجزَى القياده خير ما ينجزِي به .. وتحمي جنوده من صُدوف الليالي

واعداد غيثْ انهل وارخَى صبيبه .. من الله المعبود منش الخيالي

صلاة ربي ع النبي وصحيبه .. والتابعين ومن تبعهم وآلي